السلام عليكم ورحمة الله وبركاته
تدوينة اليوم عن شيء مهم وضروري مع كل مكياج ، لإطلالة رائعة ولافتة وجذابة ..
طبعًا كثير من البنات ما يعتبرونه شيء مهم عندهم ، ولا يشترونها أصلًا ..
لكن عني هي من ضروريات الحياة منذ الصغر ..
اللي هي عقاصة الرموش ..
طبعًا بما أني من محبات الماسكرا ، وأحب اشوف رموشي معقوصة وطويلة كأني مركبة رموش .. ولا أحب أركب رموش .. فما أستغني عنها أبدًا أبدًا ..
أول شيء لازم تعرفون إني ماخليت ولا عاقصة رموش ماجربتها .. ابتداء من بودي شوب إلى ماك .. وكلهم كنت أمشي حالي فيهم وكل ماشفت براند فيه عاقصة رموش اشتريتها لكن نفس الشيء ما ألاحظ ذاك الفرق الشاسع ..
لدرجة مره عاقصة بودي شوب انفلتت من يدي وقطعت رموشي .. وجتني الصيحة على الرموش اللي راحوا ..
لكن ما يأست من البحث والبحث ..
لما شفت خبراء تجميل كثار أثق فيهم ، منهم حنآن النجادة (القلب) ، وسندس القطان (القلب الثاني :D ) يمدحون عاقصة رموش شيمورا ..
فقررت لازم أجربها ..
شيمورا :
ماركة يابانية ، منتجاتها لا تباع بالسعودية ، ولا بدول الخليج ..
ومثل ما الكل عارف إن المنتجات اليابانية دائمًا تتفوق على غيرها ..
أشهر منتج عند شيمورا عاقصة الرموش المتميزة بشكلها الهندسي ، والحائزة على عدد من الجوائز ، والمتفوقة على 150 منتج في مجالها ..
وبما إن ماركة شوميرا مو موجودة عندنا .. مسكت معي إلا أدورها وأجربها ..
بحثت عنها ولقيتها بأمازون ..
وطلبتها ..
وسعرها مع التوصيل تقريبًا :
من 90 إلى 100 ريال يقل أو يزيد .
عمومًا هي مو غالية ، وتستاهل السعر اللي تدفعيه عليها ..
محتويات العلبة :
1- عاقصة الرموش المصنوعة من السلستيل .
2- غيار لقطعة السيلكون في حال خربت القطعة المركبة عليها .
تجربتي :
من أول تجربة وقعت بغرامها .. فعلًا تستاهل كل ريآل يندفع عليها ..
وتستاهل كل جائزة أخذتها ..
والله يا بنات كأني حاطة مسكرا لكن .. بشكل طبيعي ومرتب ..
طريقة استخدامها :
العلبة من ورا حاطين طريقة استخدامها ..
وهذا فديو يشرح طريقة استخدام عاقصة الرموش :
..
وبس ..
كلكم يا بنات لازم تكون عندكم عاقصة الرموش من شيمورا ..
اطلبوها واستمتعوا بالنتيجة المبهرة ..
ليست هناك تعليقات:
إرسال تعليق